Rétta leiðin gegn niðurbroti stéttarfélaganna

Sterk verkalýðshreyfingin er hornsteinn íslensks vinnumarkaðar og velferðar og lífsgæða launafólks. Víða um heim er reynt að brjóta stéttarfélög á bak aftur til að auka á gróða hinna fáu. Hvernig er hægt að verjast slíku niðurbroti? Er ástæða til að íslenska hugtakið „union busting“?

Christian Sweeney frá AFL-CIO, sem er stærsta verkalýðssamband Bandaríkjanna, flytur erindi um þekktar aðferðir við að grafa undan skipulögðu starfi stéttarfélaga. AFL-CIO hefur áralanga reynslu af að fást við fyrirtæki sem beita slíkum aðferðum og við ráðgjafafyrirtæki sem bjóða fram þjónustu við að brjóta niður stéttarfélög.

Sigurður Pétursson, sagnfræðingur, fjallar um reynslu Íslendinga af niðurbroti verkalýðsbaráttunnar. Sigurður ritaði bækurnar Vindur í seglum I-III, sem fjalla um sögu verkalýðshreyfingar á Vestfjörðum 1890-1970. (ASV 2011-2014).  Hann er nú kennari við Menntaskólann að Laugarvatni.

ASÍ, BSRB og Varða – rannsóknastofnun vinnumarkaðarins standa fyrir röð af hádegisfundum um réttu leiðina út úr kreppunni. Á fundunum er fræðileg umfjöllun fléttuð saman við reynslu af skipulögðu starfi verkalýðshreyfinga og annarra almannasamtaka. Fundirnir fara fram í gegnum zoom og eru öllum opnir.

Boðið er upp á túlkun yfir á íslensku og til að nýta hana þarf að smella á lítinn hnött sem birtist í stikunni og velja túlkun. Hægt er að velja "mute original sound" til að heyra eingöngu í túlkinum.